Ubuyobozi Bukuru

Adolphe KAYIGI

Umuyobozi w'Agashami k'Iterambere ry'Inzego z'Ibanze

Bwana KAYIGI Adolphe ni Umuyobozi w’Agashami k’Iterambere ry’Inzego z'Ibanze zegerejwe abaturage mu Kigo gishinzwe Guteza imbere Ibikorwa by’Iterambere mu Nzego z’Ibanze (LODA). Yabaye kandi Umuyobozi w’Agashami gashinzwe Igenamigambi muri icyo kigo kuva mu kwezi kw’Ugushyingo 2017 kugeza muri Kamena 2021; ibi bikaba bigaragaza ubunararibonye buhagije afite mu buyobozi, guhuza igenamigambi na gahunda z’iterambere ry’ubukungu buzana impinduka. Bwana KAYIGI afite uburambe mu nzego za Leta, iz’itumanaho, uburezi n’iterambere ry’abaturage.

Mbere y’inshinago afite muri LODA, Bwana KAYIGI Adolphe yabaye umukozi ushinzwe Igenamigambi n’Ikurikiranabikorwa mu Nama y’Iguhugu y’Abantu bafite Ubumuga (NCPD) kuva mu mwaka wa 2014 kugeza mu wa 2017. Mbere yaho nanone yakoreye Ikigo cy’Itumanaho cyitwaga Rwandatel Ltd kuva mu wa 2004 kugeza mu wa 2013 aho yari ashinzwe ibikorwa bijyanye n’ubucuruzi no gushaka amasoko, kwita ku bakiliya no kwagura ubucuruzi.

Kuva mu mwaka wa 2006 kugeza mu wa 2011, Bwana Kayigi yabaye umwe mu bagize Inama Njyanama y’Akarere ka Ngoma, akaba n’Umuhuzabikorwa w’Inama y'Igihugu y’Urubyiruko ku rwego rw’Akarere.

Bwana Kayigi Adolphe afite impamyabumenyi y’icyiciro cya kabiri cya kaminuza mu by’ubukungu; akanagira icyemezo cy’uko yarangije amasomo y’icyiciro cya gatatu cya kaminuza mu micungire y’imishinga muri Mount Kigali University.

Jean Claude RWAHAMA

Umuyobozi w'Agashami ko Kurengera Abatishoboye

Bwana Rwahama Jean Claude yize ibijyanye n’ubumenyi muri politiki, akaba afite impamyabumenyi y’icyiciro cya kabiri yakuye muri Kaminuza y’u Rwanda. Afite uburambe mu kazi bw’imyaka irenga 19, akaba ari inzobere muri gahunda zo kurengera abatishoboye, ibikorwa by’ubutabazi n’iterambere ry’abaturage.

Bwana Rwahama ni Umuyobozi w’Agashami gashinzwe Kurengera Abatishoboye mu Kigo gishinzwe Ibikorwa by’Iterambere mu Nzego z’Ibanze (LODA). Mbere yaho akaba yarayoboye Agashami gashinzwe Gahunda y’Icyerekezo 2020 Umurenge (VUP) muri icyo kigo. Mbere y’uko aza muri LODA, yabaye umuyobizi mu yindi myanya itandukanye aho yari ashinzwe ibikorwa bijyanye no kwita ku mpunzi mu cyari Minisiteri y’Imicungire y’Ibiza no kwita ku mpunzi (MIDIMAR), ndetse n’ibyerekeye iterambere ry’abaturage muri Minisiteri y’Ubutegetsi bw’Igihugu (MINALOC).

Mu kazi yakoze, Bwana Rwahama yagaragaje ubunararibonye bwihariye mu guhuza ibikorwa by’ubutabazi, kandi agira uruhare mu ishyirwa mu bikorwa rya gahunda zo kurengera abatishoboye no kugabanya ubukene mu Rwanda.

Geofrey BIZIMUNGU

Umuyobozi wa Porogaramu yo Kurengera Abatishoboye no gufasha Abaturage Kwivana mu Bukene (EPR&SPTP)

Moses RUTAYISIRE

Umuyobozi w'Umushinga 'Village Model Project'

Bwana RUTAYISIRE Moses ni Umuyobozi w’Umushinga ‘Umushinga ku Mudugudu’ (Village Model Project - VMP), akaba ashinzwe guhuza ibikorwa, ishyirwa mu bikorwa n’ikurikiranabikorwa ry’imishinga y’abafatanyabikorewa batandukanye bigamije iterambere ry’abaturage  binyuze mu guhanga imirimo ku rwego rw’Umudugudu. Bwana Rutayisire afite uburambe bw’imyaka irenga icumi mu gukorana n’inzego za Leta n’iz’abikorera; ibi bikaba byaramuhaye kuba inzobere mu guhuza ibikorwa by’imishinga, iterambere ry’ubukungu mu baturage mu bufatanye n’inzego z’abikorera.

Mbere yo kuza muri LODA, Moses yabaye Umuhuzabikorwa w’Imishinga ndetse n’Umuyobozi Nshingwabikorwa w’Ishami ry’Ubukerarugendo mu Rugaga rw’Abikorera (Private Sector Federation - PSF), aho yagize uruhare mu iterambere ry’abikorera, iterambere ry’ubukerarugendo, korohereza ishoramari, n’imikoranire n’abafatanyabikorwa.

Nanone kandi muri LODA, Moses yagize uruhare mu ishyirwa mu bikorwa ry’imishinga itandukanye nka Local Competitiveness Facility (LCF) na Nyabarongo Ecosystem Rehabilitation Project, aho yakoranye n’inzego za Leta, abafatanyabikorwa batandukanye ndetse n’inzego z’ibanze mu kuyishyira mu bikorwa no kyicunga neza kugirango igere ku musaruro wifuzwaga.

Bwana RUTAYISIRE Moses afite impamyabumenyi y’icyiciro cya gatatu cya kaminuza mu bijyanye n’imiyoborere n’imishinga y’ubucuruzi yakuye muri University of East London, akagira n’iy’icyiro cya kabiri muri byo yakuye muri Kamunza y’u Rwanda. 

Placidie UWAMARIYA

Umuyobozi w'Umushinga wa 'Basket Funding for Pro-Poor Development (PPD-Basket)'

Madamu UWAMARIYA Placidie ni Umuyobozi w’Umushinga  ubarizwa muri LODA witwa Basket Funding for Pro-Poor Development (PPD-Basket) kuva muri Mata 2025 kugeza ubu. Mu nshingano ze, akurikirana imikorere y’uyu mushinga twakwita nk’ikigega gihuriyemo abaterankunga batandukanye (barimo AFD, KfW, na LuxDev), kigamije gutera inkunga imishinga y’ibikorwa remezo mu turere 16 tw’u Rwanda, mu buryo budaheza kandi buteza imbere uburinganire hagati y’abagore n’abagobo. Inshingano ze zibanda ahanini ku gucunga ishyirwa mu bikorwa ry’imishinga mu buryo bwita ku bidukikije kandi bwita ku mibereho y’abaturage, akaba umuhuza wa komite zigenzura uyu mushinga ndetse n’uw’abaterankunga.

Mbere yo kwinjira muri LODA, Madamu UWAMARIYA yabaye Umuyobozi w'Agashami gashinzwe Imari mu Karere ka Nyaruguru (kuva 2019 – Mata 2025). Yayoboye ibikorwa byose bijyanye n’imikoreshereze y’imari mu karere, akagira inama Komite Nyobozi, kandi agacunga ingengo y’imari y’umwaka n’iy’igihe kiringaniye, mu buryo bukurikije amategeko n’amabwiriza y’imikoreshereze y’imari ya Leta. Yahuje kandi ibikorwa bijyanye no gutegurira raporo z’imikoreshereze y’imari ku mishinga yatewe inkunga n’abafatanyabikorwa batandukanye. Mu gihe yayoboraga imikoreshereze y’imari, Akarere ka Nyaruguru kavuye ku guhabwa amanota y’ “Agahomamunwa” kagera kuri “Nta makemwa” muri raporo z’Umugenzuzi Mukuru w’Imari ya Leta. Mbere yo gukorera Akarere, Madamu UWAMARIYA yabaye umukozi (Cashier) muri Banque Populaire du Rwanda SA (kuva muri Mutarama 2010 – Ukuboza 2016).

Madamu UWAMARIYA afite impamyabumenyi y’icyiciro cya kabiri cya kaminuza mu ibaruramari n’icungamutungo, akagira n’iy’icyiciro cya gatatu mu icungamutungo. Ni umukozi ufite uburambe bwagutse mu micungire y’imishinga n’imari, amabanki, icungamutungo mu nzego za Leta n’iz’abikorera, ndetse no gukorana n’abaterankunga batandukanye mu mishinga y’iterambere.

Mu kazi ke, UWAMARIYA agaragaraho kugira ubumenyi n’ubushobozi ndashyikirwa mu gukoresha uburyo bw’ikoranabuhanga bwifashishwa mu micungire y’imari ya Leta (Integrated Financial Management Information System - IFMIS). Asobanukiwe neza ibijyanye no kubahiriza amategeko n’amabwiriza ya Leta aganga imikoreshereze y’imari, imitangire y’amasoko, igenamigambi, n’amabwiriza ngenderwaho muri serivisi za Leta. Afite kandi ubumenyi mu gutangiza imishinga, kuyiyobora, kwirinda no gukemura ibibazo biyishamikiyeho, gukurikirana ko ishyirwa mu bikorwa uko byagenwe,  ndetse no gukorana n’abafatanyabikorwa batandukanye.