INAMA Y'UBUTEGETSI YASHIMYE URUHARE RW'IMISHINGA ITERWA INKUNGA BINYUZE MURI LODA MU ITERAMBERE RY'UTURERE

Amajyaruguru -  Abagize Inama y'Ubutegetsi y'Ikigo Gishinzwe Guteza Imbere Ibikorwa by'Iterambere mu Nzego z'Ibanze (LODA), hamwe n'Ubuyobozi Bukuru bwa LODA bagiriye uruzinduko rw'iminsi ibiri mu Turere twa Musanze na Burera, rugamije gusura imishinga y'iterambere  iterwa inkunga binyuze muri LODA, ndetse no kuganira n'abaturage bagerwaho n'iyo mishinga.

Umunsi wa mbere w'uru ruzinduko waranzwe n'ibiganiro hagati y'ubuyobozi bw'Akarere ka Musanze ndetse no gusura ibikorwa n'imishinga yakozwe muri aka karere.

Mu bikorwa byasuwe harimo Ikigo Nderabuzima cya Kabere kiri mu Murenge wa Muko, ibiraro bitandukanye byubatswe mu bice bitandukanye by'akarere, Agakiriro ka Musanze, imihanda ya kaburimbo yubatswe mu bice bitandukanye by'umujyi wa Musanze, Ivuriro rito rya Cyuve, Isoko rya Kaliyeri, Ikigo cy'Urubyiruko cya Musanze, ndetse na Musanze Food Court.

Perezida w'Inama y'Ubutegetsi ya LODA, Madamu Annoncée Kuradusenge, yashimye Akarere ka Musanze uburyo gakoresha neza inkunga kabona mu guteza imbere ibikorwa by'iterambere binyuze muri LODA, ndetse no kugaragaza udushya mu ishyirwa mu bikorwa ry'iyo mishinga.

Yagize ati “Turashaka kubashimira ko mukoresha neza ubufasha muhabwa, kandi mugahanga udushya. Turifuza ko mwakomeza muri uwo murongo, kandi mugakomeza kunoza imikoranire n'urugaga rw'Abikorera. Ibikorwa mwakoze ni ibyo gushimwa, kandi tuzakomeza kuganira ku buryo haboneka inkunga ku yindi mishinga mwagaragaje".

Ubuyobozi bw'Akarere ka Musanze burashima imikoranire n'ubufatanye na LODA, bukagaragaza ko imishinga yakozwe binyuze mu bufatanye na LODA, yagize uruhare rugaragara mu guhindura isura y'Umujyi w'Akarere ka Musanze.

Umuyobozi w'Akarere wungirije ushinzwe Iterambere ry'Ubukungu, Madamu UWANYIRIGIRA Clarisse, ati  “Urebye imishinga yakozwe mu Karere kacu ku bufatanye na LODA, twavuga tudashidikanya ko ari yo igaragaza iterambere ry'Umujyi wa Musanze”.

Umuyobozi w’Ishami rishinzwe Iterambere ry’Abaturage no Guhuza Ibikorwa muri LODA, Maurice Nsabibaruta, yavuze ko LODA yiteguye gukomeza gushyigikira iterambere ry'imijyi yunganira Kigali, ndetse no guteza imbere ibikorwa by'iterambere mu nzego z'ibanze.

Yagize ati “Nk'umwe mu mijyi yunganira Kigali, dushimishwa n'uko LODA yagize uruhare mu iterambere ryawo. Twizera ko ba mukerarugendo benshi bazakomeza kwiyongera muri aka karere, kubera ko babona ko ukomeza gutera imbere".

Umunsi wa kabiri w'uru ruzinduko wibanze ku gusura ibikorwa biri mu Karere ka Burera, ahasuwe Urugo Mbonezamikurire y'Abana Bato rukorera mu rugo rw'umuturage rwitwa Ikirezi Home-Based ECD Center, ruherereye mu Mudugudu wa Nyangezi, Akagari ka Rwasa, mu Murenge wa Gahunga.

Uru Rugo Mbonezamikurire rwita ku bana 34, mu kubafasha kubona serivisi zikomatanyije z'imbonezamikurire y'umwana.

Ababyeyi bafite abana muri uru Rugo Mbonezamikurire, bavuze ko byabafashije kubona aho basiga abana mu gihe bagiye mu mirimo, ariko bakanashima ko abana bahabonera serivisi z'imbonezamikurire, zirimo kubigisha binyuze mu mikino no kubakangura mu bwonko, bikabategurira gutangira amashuri abanza.

Mu Karere ka Burera kandi iri tsinda ryasuye umuyoboro w'amazi meza wa Bushoka-Nyanga, uherereye mu Murenge wa Kinoni. Uyu muyobozo ukaba warubatswe binyuze mu Kigega Basket Funding for Pro-Poor Development (PPD-Basket), ukaba ugeza amazi meza ku baturage basaga 3,860.

Abaturage bishimira ko uyu muyoboro wabegereje amazi meza, ukaba warabaruhuye kuvoma amazi mabi yo mu Kiyaga cya Ruhondo baturiye.

Mu gusoza uru ruzinduko, abagize Inama y'Ubutegetsi ya LODA bashimye byimazeyo uruhare rw'imishinga iterwa inkunga binyuze muri LODA mu iterambere ry'inzego z'ibanze, basaba ko hashakwa uburyo bwo kurushaho kumenyekanisha ibi bikorwa.